اضحك مع الثورة .. هع هع هع هع هع

رسالة من تلميذ مصري :
إلى أعزائي المتظاهرين في ميدان التحرير .. بخصوص الثورة اللي شغالة عندكم : متنسوش أنها هتدخل في مادة التاريخ ، واحنا اللي بنحفظ ، فاختصروا من فضلكم
ــــــــــــــــــــــــــــــــــــــــــــــــــــــــــــــــــــــــــــ

أمثال جديدة :
إن كنتو نسيتو اللى جرا هاتو الأجندة تنقرى
قولوا للي أخد الأجندة يخاف
ياني ياني ياني ... مش كاتب في اجندة تانى
يا اجندتين فى العلالى يا بلحهم ورق
الكشاكيل نامت و الأجندات قامت
ــــــــــــــــــــــــــــــــــــــــــــــــــــــــــــــــــــــــــــ

انا مندس .. انا مندس ، هاتلي أجندة ووجبة وبس

من هارديز او من كنتاكي ، هاتلي وجبة دينر بوكس

أو سوبر زنجر من غير خس

هاتلي أجندة من الفجالة ، أعمل بيها ثورة في مصر

أنا مندس ، أنا مندس ، وكل الشعب كمان مندس

انا مندس انا مندس بطفح ماك وبشرب بيبس

ــــــــــــــــــــــــــــــــــــــــــــــــــــــــــــــــــــــــــــ
ذهب الليل طلع الفجر والشعب اتحرر .. اتحرر
شاف مبارك قاله اتنحى ، والنظام فرفر .. فرفر
الشعب قالولوا سيب السُلطة وخلينا فى حالنا
شد نفسه وبعت حراسته وراح جر شكلنا
قامت الناس قعداله وحلفت ماهي رايحة بيوتها
وآدي جزات اللي يتلامض مع الشعب بتاعنا
ــــــــــــــــــــــــــــــــــــــــــــــــــــــــــــــــــــــــــــ

مبارك بيضيّع وقت. وعايز يلعب بلانتيات
يبدو ان التلفزيون المصري بينقل الأحداث من عالم سمسم
عاجل.. اسرائيلل تسحب كل رعاياها من مصر... ماعدا حسني مبارك
بيقولك الراجل بتاع كنتاكي ابو دقن بيضا ده طلع اخوان!.. الواحد مابقاش عارف يثق في مين!
عاجل: مطلوب التبرع بالدم لمبارك.. فصيلة الدم "زواحف"
أحدث شتيمة اللآن.. "انت عيل أجندة"!!
حمعة الرحيل.. سبت الغضب.. أحد الزعل.. اثنين القهر.. ثلاثاء الطفش.. انصرف بقى!
من أمثال الثورة : ساعة "الحظر" متتعوضش
الجزيرة : ملايين المتظاهرين فى التحرير .. العربية : مئات الالاف .. التلفزيون المصري : ألوف المتظاهرين .. مبارك : أنا مش شايف حد
واجعين دماغنا : صاحب الضربة الجوية ، صاحب الضربة الجوية
يا ريت مبارك كان ضربنا إحنا الضربة الجوية ، وراح حكم إسرائيل 30 سنة ، كان زمانهم بيشحتوا دلوقتي
ـــــــــــــــــــــــــــــــــــــــــــــــــــــــــــــــــــــــــــ
بمناسبة الأجندات الخارجية :

أنا عندي أجندات كتير أوي في الشغل و في البيت أعمل فيهم إيه .. مش عارف أنا مرعوب

أجنده وارد الخارج بحاله جيده استعمال طبيب للبيع لغرض التفرغ للاجندات الوطنيه

بيقولوا و انت داخل التحرير دلوقتي مبيشوفوش البطاقة، بيشوفوا الأجندة الخارجية معاك ولا لا

عاجل على التلفزيون المصري : السلطات تقبض على ثلاثة شبان يحاولون تهريب أجندات إلى ميدان التحرير

التلفزيون المصري : العثور على ثلاث أجندات في كنيسة بالقرب من المهندسين

ياحلو بانت لبتك اول ما شوفت أجندتك

قالت والاجندة في يديها .. بتقلب أيام وشهور .. قالت يا حسني لاتحزن .. فالكرسي مكسور مكسوور .. يا حسني مخلوع مخلووع .. يااا حسني
ــــــــــــــــــــــــــــــــــــــــــــــــــــــــــــــــــــــــــــ

a new word added to the dictionary
Mubarak:
–verb (used with object)
to stick an object to another object.
example : I'll mubarak you to the wall
ــــــــــــــــــــــــــــــــــــــــــــــــــــــــــــــــــــــــــــ

أفلام جيل الثورة:
ابي فوق الدبابة
عودة النت
المندس والأجندة
الرصاصة المطاطية لاتزال في جيبي
في بيتنا بلطجية
لا اختنق ولكني استغيث
رد نتي
ستاتس هزت عرش مصر
ليلة القبض على عز
عض بلدي ولا تعض نتي
جاءنا الرئيس التالي
نحن لا نرمى المولوتوف
مهمة في ميدان التحرير
الريس عمر سليمان
حرامية في لندن
البحث عن دستور
اسماعيل ياسين فى ميدان التحرير
اسماعيل ياسين يواجه البلطجية
اسماعيل ياسين فى الامن المركزي
العدلي وبطرس وحسني
في محطة التحرير
واحد من المتظاهرين
عمر بوند
حصان فى الميدان
أجندة واحدة لا تكفي
أجندة في تل أبيب
اجندة سميحة بدران
نحن لا نزرع الكنتاكي
أجندة في الممر
يا عزيزي كلنا اجندات
أفواه و أجندات
احنا بتوع الأجندة
الإنس و الأجندة
the devil wears agenda
Harry potter and the half blood Agenda
The lord of the Agendas
ــــــــــــــــــــــــــــــــــــــــــــــــــــــــــــــــــــــــــــ